ORDENSREGLEMENT FOR ELEVAR

Forskrift fastsett med heimel i opplæringslova (Oppl) av 17.07.98 nr 61, §§ 2-9

og 3-7. Del A vedtatt i utdanningsstyret 09.03.06 og Del B vedtatt av skoleutvalet ved Spjelkavik videregående skole.

DEL A. Felles for alle vidaregåande skolar i Møre og Romsdal

FORMÅL

§ 1 Alle elevar har rett til eit godt fysisk og psykososialt miljø, som er rusfritt, og fritt for mobbing, vald og anna krenkande åtferd. Formålet med reglementet er å skape godt samarbeid, god trivsel, respekt og medansvar. Reglementet skal fremme god orden og gode arbeidsvanar og slik legge til rette for god læring.

Reglementet forpliktar heile skolesamfunnet.

Reglementet skal omfatte:

· Elevane sine rettar og plikter

· Orden og åtferd

· Tiltak overfor elevar som bryt reglement, og framgangsmåten ved handsaming av slike saker

VIRKEOMRÅDE

§ 2 Reglementet gjeld for alle elevar ved skolen under opplæring og, så langt anna ikkje er bestemt, også for vaksenopplæringa sine elevar, lærlingskoleelevar, hospitantar og andre når opplæringa går føre seg i skolen sin regi.

Reglementet gjeld også ved opplæringsformer og aktivitetar som blir gitt under skolen sitt ansvar og skolen sin regi utanfor skolen sitt område, så langt dette ikkje er i strid med lokalgitte påbod eller forbod, eller ved ekskursjonar.

Reglementet er retningsgivande for vurdering av orden og åtferd.

RETTAR

§ 3 Elevane har rett til vidaregåande opplæring jfr. opplæringslova med forskrifter, fylkeskommunale vedtak og gjeldande læreplanar.

§ 4 Eleven har rett til ei opplæring som er tilpassa føresetnader, evner og behov. Eleven har derfor rett til og skal delta i:

· Planlegging av opplæringa

· utforming av periodeplanar

· tolking og analyse av læreplanmål

· utforming av læringsmål

· val og utforming av kriterium for vurdering

· val av lærestoff i forhold til læreplanane, m.a. rett til sjølv å velje læreverk

· val av arbeids- og vurderingsformer

· gjennomføring av opplæring

· vurdering av opplæringa

· sluttresultatet av arbeidet i forhold til læringsmål.

· prosessen som førte fram til resultatet.

Desse momenta kan vere individuelle for den enkelte elev, felles for ei mindre gruppe eller for større grupper.

Skolen er ansvarleg for å gi elevane dei nødvendige føresetnadene for å kunne delta aktivt i dette arbeidet.

§ 5 Elevane har rett til å få tilbakemelding, oppfølging og rettleiing i forhold til dei mål den enkelte arbeider etter.

§ 6 Det skal gjennomførast førebudde elevsamtalar minst ein gong kvar termin mellom elev og kontaktlærar eller annan lærar.

§ 7 Ved faglege, personlege eller sosiale vanskar som har innverknad på opplæringa, har elevane rett til rådgiving, oppfølging og hjelp til å finne seg til rette, m.a. tilgang til sosial- og spesialpedagogisk teneste.

§ 8 Elevane har rett til rådgiving om utdanning og yrkesval.

§ 9 Skolen skal ha eit system som sikrar at det blir vurdert i kva grad organiseringa, tilrettelegginga og gjennomføringa av opplæringa er med på å nå dei måla som er fastsett for eleven eller gruppa. Grunnlaget for vurderinga er læreplanverket sin generelle del og fagspesifikke delar som heile skolesamfunnet er forplikta overfor. Eleven har rett til og skal delta i denne vurderinga.

§ 10 Elevane har rett til og bør ta opp med skolen (faglærar, kontaktlærar, rådgivar, skoleleiinga, evt. gjennom elevtillitsvalde) forhold som ikkje fungerer tilfredsstillande.

§ 11 Elevane har rett og plikt til å danne elevråd og vere representert i skoleutval, skolemiljøutval og arbeidsmiljøutval.

Elevrådsrepresentantar har rett til regelmessige møte med skoleleiinga.

PLIKTER

§ 12 Elevane har plikt til å rette seg etter lover, reglement og instruks som gjeld.

§ 13 Elevane plikter å delta aktivt i opplæringa i den form den blir avtalt.

§ 14 Eleven skal snarast mogleg ta kontakt med faglærar dersom han/ho ikkje kan følgje opp arbeid til avtalt tid.

§ 15 Elevane skal følgje verne- og tryggleiksreglar og bruke det arbeidsty og verneutstyr som blir kravd i læreplan eller som er påbode av arbeidstilsynet, departementet eller skolen.

§ 16 Elevane skal halde seg med nødvendig lærestoff, materiell og utstyr til eige bruk som skolen ikkje held. Pålagt materiell og utstyr eller betaling for dette må ikkje vere i strid med forskrift eller vedtak frå departementet eller fylkeskommunen.

§ 17 Skolen sin eigedom og skolen sitt utstyr skal brukast med omtanke. Hærverk og skade kan føre til erstatningsansvar, jf. skadeserstatningslova.

§ 18 Elevar som gjennom sitt arbeid, oppdrag eller verv i samband med vidaregåande opplæring blir kjend med spesielle opplysningar, har teieplikt etter forvaltningslova sine reglar § 13 - 13 f. Teieplikta gjeld også etter at eleven har avslutta vidaregåande opplæring.

Del B. Spesielle reglar for Spjelkavik videregående skole

Arbeids- og læringsmiljø

§ 19 Det skal leggast vekt på å skape eit godt arbeids- og læringsmiljø prega av engasjement, aktiv deltaking og gode samarbeidsformer mellom alle i skolen. Det er viktig å vise respekt og medansvar og unngå eller hindre åtferd som har negativ innverknad på miljøet.

a) Alle må opptre omsynsfullt, realt og høfleg overfor kvarandre. Plaging, mobbing, vald, trugsmål, rasistiske utsegner og handlingar, seksuell trakassering, sjikane på grunn av religion/livssyn eller anna krenkande åtferd blir ikkje akseptert, og alle partar i skolesamfunnet pliktar å hindre at dette skjer.

b) Arbeidsvanane til alle i skolen skal vere prega av ansvar og orden med ryddig, punktleg og påliteleg framferd og åtferd.

c) Alle har ansvar for at det er arbeidsro i timane og at det blir vist respekt for opplæringa.

d) Det er viktig for trivselen at det blir halde god orden, og at det er reint og ryddig over heile skolen - ute og inne.

e) Alle har ansvar for at skolebygningar og inventar, utstyr og materiell som skolen har, blir tatt godt vare på.

f) Det er ikkje lov å røyke, snuse eller bruke andre tobakksprodukt i skolebygget og på uteområdet, og i lokale som skolen leiger.

g) Bruk og oppbevaring av rusmiddel er forbode på skolen sitt område. Det er også forbode å vere påverka av rusmiddel.

h) Det er ikkje tillate å bruke skolen sitt internett til å laste ned eller spreie pornografisk, rasistisk eller anna materiale som kan oppfattast som krenkande, eller som bryt norsk lov.

i) Mobiltelefon eller tilsvarande kommunikasjonsutstyr skal vere avslått i alle timar.

j) Det er forbode å ha med seg og oppbevare farlege gjenstandar eller våpen på skolen sitt område.

Oppmøte og fråvær

§ 20

a) Aktiv deltaking er nødvendig for god læring. Elevane er av den grunn forplikta til å møte presis til opplæringa med mindre det ligg føre avtale med rektor, kontaktlærar eller faglærar om ei anna arbeidsform.

b) Dersom fråværet varer meir enn tre dagar i samanheng, skal skolen ha melding.

Om ein elev blir sjuk eller av annan tvingande grunn må forlate undervisninga i løpet av skoledagen, skal eleven alltid melde frå til kontaktlærar/faglærar eller administrasjonen/ekspedisjonen.

Ein elev som må vere borte frå skolen, skal søke permisjon hos:

· faglærar om enkelttimar

· kontaktlærar når fråværet er meir enn 1 time og inntil ein heil skoledag

· rektor for meir enn ein skoledag

Organisert eller sjølvstendig studiearbeid og skoleadministrative gjeremål blir ikkje rekna som fråvær når det er avtalt med rektor, kontaktlærar eller faglærar.

c) Rektor kan gi elevar fri frå undervisninga i opptil 14 skoledagar i eit skoleår utan at desse dagane skal førast som fråvær på dokumentasjonen. Det gjeld til dømes fråvær i samband med:

· arbeid som tillitsvald

· politisk arbeid

· hjelpearbeid

· lovpålagde oppmøte

· fråvær av helsegrunnar (med eigenmelding for myndig elev / underskrift frå
føresette for yngre elevar)

· fråvær av velferdsgrunnar

· inntil to dagar ved religiøse høgtider for elevar som er medlemmar i andre trussamfunn enn Den norske kyrkja. Elevane kan søkje skolen om at fråvær i samband med religiøse høgtider ut over dei to dagane, ikkje skal bli rekna som fråvær.

d) Alt fråvær ut over dei 14 dagane skal førast på vitnemål og kompetansebevis. Fråvær skal førast i dagar og enkelttimar.

Eleven/kursdeltakaren kan krevje at grunnen til fråværet blir ført på dokumentasjonen og er sjølv ansvarleg for å dokumentere grunnen til fråværet.

Fusk eller forsøk på fusk

§ 21 Bruk av ulovlege hjelpemiddel og kommunikasjon med andre i ein prøvesituasjon blir rekna som fusk. Det same gjeld kopiering eller avskrift av andre sitt arbeid og som blir levert som eige produkt.

Dersom ein elev blir tatt i fusk eller forsøk på fusk ved prøver, skal forholdet meldast til rektor. Fusk eller forsøk på fusk er eit tillitsbrot og eit brot på skolen sitt reglement for orden og åtferd.

Karakteren på den prøva eller det arbeidet det gjeld, blir annullert. Konsekvensane kan bli at eleven ikkje får termin- eller standpunktkarakter. Ved tap av standpunktkarakter misser elevane retten til å gå opp til eksamen, evt. få annullert eksamen i faget.

Dersom ein elev blir tatt i fusk eller forsøk på fusk i samband med eksamen, skal saka meldast til rektor og/eller eksamensansvarleg og blir behandla etter reglane i forskrift til opplæringslova § 4 – 57.

Ekskursjonar

§ 22 Reglementet gjeld også for ekskursjonar og klasseturar.

Nærare reglar om ekskursjonar og klasseturar i skolen sin regi går fram av ekskursjonsreglementet som da blir ein del av ordensreglementet.

Orden og åtferd

§ 23 Ved fastsetting av karakterar i orden og i åtferd skal ein ta omsyn til om eleven viser vanleg god arbeidsinnsats, og til korleis eleven følgjer ordensreglane som er fastsette for Spjelkavik videregående skole

· Ugyldig fråvær kan føre til nedsett karakter i orden

· ved fastsetting av karakter i åtferd tek ein omsyn til korleis eleven ter seg på skoleområdet og elles når skolen har ansvaret for tilsynet med eleven. Ein skal særleg leggje vekt på korleis eleven ter seg mot andre elevar, lærarar og andre tilsette. Ein kan også ta omsyn til korleis elevane ter seg mot kvarandre på skolevegen og til korleis eleven følgjer ordensreglane som er fastsette for skolen.

Tiltak ved brot på reglementet

§ 24 Brot på reglementet vil resultere i ulike sanksjonar:

· munnleg/skriftleg åtvaring frå lærar

· munnleg/skriftleg åtvaring frå rektor

· skriftlege avtalar

· kontakt med heimen( og involvering frå føresette)

· vere på skolen før og etter skoletid i samband med samtalar med lærar/rektor og/eller utføring av pålagde oppgåver

· nedsett karakter i orden

· nedsett karakter i åtferd

· beslag av ulovlege gjenstandar

· pålegg om oppgåver for å rette opp skade som elevar har påført skolen sin eigedom eller eignelutar

· erstatningsansvar

· avgrensa høve til deltaking i særskilte aktivitetar - t.d. ekskursjonar

· bortvising frå gruppe for resten av timen/arbeidsperioden eller resten av dagen etter avgjerd frå rektor

· bortvising frå skolen for lengre tid enn resten av skoledagen

· mellombels eller permanent bytte av gruppe

· bortvising frå vidaregåande skole for resten av kurset

· tap av retten til vidaregåande opplæring

· melding om straffbare tilhøve

· stort fråvær kan medføre at grunnlaget for å gi vurdering med standpunktkarakter manglar

Når det gjeld nærare om dei einskilde døma, blir det vist til Rundskriv Udir-07-2005, opplæringslova §§ 3-7 og 3-8 og forskrifter, skadeerstatningslova § 1-2.

Alle tiltak skal dokumenterast skriftleg.

Før refsingstiltak blir sett i verk, skal eleven ha høve til å forklare seg. Ved alvorlege refsingstiltak skal det fattast enkeltvedtak etter forvaltningslova § 2. Det blir òg vist til saksbehandlingsreglane i forvaltningslova kap III – IV.